"Evgenivs(1) episcopus, seruus seruorum Dei, uniuersis christifidelibus, presentes litteras inspecturis, salutem et apostolicam benedictionem. Licet is, de cuius munere uenit, ut sibi a suis fidelibus digne et laudabiliter seruiatur, de habundantia sue pietatis, que merita supplicum excedit et uota bene seruientibus sibi multo maiora retribuat, qua ualeant promereri, nichilominus tamen desiderantes Domino populum reddere acceptabilem et bonorum operum sectatorem, fideles ipsos ad complacendum ei quasi quibusdam allectiuis muneribus, indulgentijs uidelicet et remissionibus inuitamus, ut exinde reddantur diuine gratie aptiores. Cum itaque, sicut accepimus, parrochialis ecclesia sancti Jacobi in Rortpach(2), Patauiensis diocesis, per crucis Christi inimicos ac perfidos Hussitas(3) et Bohemes in suis structuris et edificijs destructa non modico christifidelium pro illius reparatione fienda suffragio idigeat, nos cupientes, ut ecclesia ipsa congruis honoribus frequentetur et in dietis, structuris et edificijs reparetur atque conseruetur, et ut fideles ipsi eo libentius deuotionis causa confluant ad eandem, necnon ad reparationem et conseruationem huiusmodi manus promptius porrigant adiutrices, quo ex hoc ibidem dono celestis gratie uberius conspexerint se refectos, de omnipotentis Dei misericordia ac beatorum Petri et Pauli apostolorum, eius auctoritate confisi, omnibus uere penitentibus et confessis, qui in natiuitatis, circumcisionis, epiphanie, resurrectionis, ascensionis et corporis Domini nostri Jhesu Christi, penthecostes, necnon in natiuitatis, annuntiationis, purificationis et assumptionis beate Marie virginis et natiuitatis beati Johannis baptiste, sanctorum Petri et Pauli apostolorum, ac in ipsius ecclesie dedicationis festiuitatibus, necnon in celebritate omnium sanctorum, ac per ipsarum natiuitatis, epiphanie, resurrectionis, ascensionis et corporis Domini, necnon natiuitatis et assumptionis beate Marie ac natiuitatis beati Johannis baptiste et apostolorum predictorum festiuitatum octauas, et per sex dies dictam festiuitatem penthecostes immediate sequentes, ecclesiam deuote uisitauerint annuatim et ad reparationem ac conseruationem predictas manus adiutrices porrexerint, singulis uidelicet festiuitatum et celebritatis tres annos et totidem quadragenas octauarum uero et sex dierum predictorum diebus, quibus ecclesiam uisitauerint, et ad reparationes ac conseruationem premissas manus adiutrices porrexerint, ut prefertur, centum dies de iniunctis eis penitentijs misericorditer relaxamus, presentibus post viginti annos minime ualituris. Volumus autem, quod si alias uisitantibus ecclesiam uel ad reparationem ac conseruationem predictas manus porrigentibus adiutrices aut alias inibi pias eleemosinas erogantibus seu alias aliqua alia indulgentia imperpetuum uel ad certum tempus nondum elapsum duratura per nos concessa fuerint, presentes littere nullius existant roboris uel momenti. Datum Rome, apud sanctum Petrum anno jncarnationis Dominice millesimo quadringentesimo quadragesimo sexto, tertio k[alendis] aprilis, pontificatus nostri anno sextodecimo."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 309 (S 203), S. 335-336