"Ich Wenczlla Kaemer(1), die tzeit pwrger tzue Chrwmbawe, vnd mein elleichew hawsfraw Margret(2), der Yaukchenpergeryn tochtter, dy vor mallen gehabt hat Hainreichen den Schwizzen(3) selligen, vnd ich, Wendelmuett(4), des Yaukchenperger sellige wittib, wir vergehen fwer vns vnd fwer all vnsser eriben, frewnt vnd nachchomen, vnd twenn chwendt offenleich mit dem briff allen den er fwer chwmbt, die yn sehent oder horent lessen, das wir mit wolbedachtem muet vnd nach ratt, kwnst vnd willen aller vnsser frewnt vnd tzue der tzeit, do wirs mit recht woll getuen machten, recht vnd redleich chawffleich tzue chauffen geben haben dem erbern Hannssen dem Hawtzenperger(5), die tzeit puerkchsezz tzue Neubuergk(6), seiner hawsfrawn, vnd all seinen erben, unssrew tzwen guet, dy wir gehabt haben tzue Reichenaw(7), vnd sind gelegen yn Reichenawer pharr vnd yn Wittigenhawsser(8) lantgericht, vnd sind lehen von dem edllen wollgeboren vnsserem genedigen herren, herrn Hainreichen von Rassenbergk(9), vmb sechs vnd tzwaintzzigk phwnt guetter Wienner phening, dew sy vns darvmb geben habent, der vns wolbenueegt hat, vnd der wir auch von yn gantz vnd gar gericht vnd gewert sein tzue rechten taegen an allen schaden. Wir antwuertten yn auch dy egenant tzway guetter mit aller tzuegehorwng, mit allen eren, rechten vnd nuetzen, die dar tzue gehorent tze hauss, tze hoff, holtz, velld, waid, wissmad, wasser, wie das alles genant ist, versuecht vnd vnuersuecht, nichtz aussgenomen recht, alls wir das selber vngeuerleich yn gehabt, herpracht vnd genossen haben, aus vnsser nutz vnd gewer yn yr nutz vnd gewer, mit herren hant vnd mit aller stett, der sew tzue recht dar vber peduerffen vnd muegen, auch allen yren frwmb woll da mit handelln mit versetzen, mit verchawffen, geben, schaffen machen, wie oder wemd sy wellen, wie yn das aller pest fueeg, vnd ist an all vnsser yrrwng vnd hindernues. Wir vertzeichen vns auch fwer vns vnd vnsser eriben vnd frewnt der egenanten guetter mit aller tzue gehorwng gentzleich yn rechter vertzicht weis mit dem gegenwuerttigen briff allso, das wir noch all vnsser eriben noch nymant von vnssern wegen chain ansprach noch vadrwng ewigchleich nymermer dar nach haben noch gewingen schullen noch ermuegen, weder mit recht noch an recht, yn chainer lay weis angeuer. Wir obgeschriben all sein auch der egenanten tzwain guetter mit aller yr tzuegehorwng ir recht gewer vnd fuerstant fwer all ansprach, wan yn des not vnd dwrfft geschiecht, alls chawffs vnd vmbuerlehentz guetz ym lant, da dew guetter yn gelegen sind, recht ist. Ging yn aber an der gewerschafft mit recht ichtz ab, das sew der schaden genant wer, den in aus [?] oder ir gewisser scheinbot pey seinen trewen schlechtleich gesprechen mag, vngesworen vnd an alls recht, den selben schaden allen mit sambt dem hawbtguet schuellen sew haben, datz vns vnd vnsseren trewen vnd dar tzue auff aller vnsser hab, wo wir dew vberall yndert haben, gewingen oder hinder vns lassen, wo dy gelegen oder wy dew genant ist, auff wasser, auff lant, ynner lantz oder ausser lantz, yn stetten oder oder [!] ynn merkchten, nichtz aussgenomen, der muegen sew sich dan woll vnderwinden, vnd dan dy selben vnsser hab ynne haben, nuetzen vnd nyssen an allen abschlag vntz alls lang vnd alls vill, das sew hawbtguetz vnd aller scheden dauon wechoment, des sy sein genomen habent, vnd das ist gentzleich vnsser guetter will vnd wort, vnd was wir oder ander ymant von vnssern wegen da wider tretten oder tetten, es wer mit recht oder an recht, das habent sew an aller stat gegen vns wehabt vnd gewunen, vnd wir gar vnd gantz gein yn verloren. Vnd des alles tzu einem waren staettigen vrchuend geb wir yn den offen briff, wesigellt vnd wolbestett mit der erbern vnssern lieben frewnt Yacoben des Hawtzenperger(10) vnd Yorigen des Ruesstorffer(11) vnd Yohann des Schawffler(12) aus der oed(13), aller dreyer anhangunden ynsigel, dew alle drey yrew ynsigell an den briff gehangen habent dwrich gutter tzeugnues vnd vnser vleissigen pett willen, yn vnd all yren eriben an schaden. Vnder dew ynsigll ich mich, obenanter Wentzla Kaemer vnd mein obenantew hausfraw Margret, vnd ich mich obenantew Wendellmuett dewe Yawkchenpergeryn verpinden fwr vns vnd all vnsser eriben vnd frewnt mit vnsseren trewen an aydes statt, alles das warr vnd stet tzu haben vnd an dem briff geschriben stet, der geben ist, do man tzallt von Chrissty gepurd virtzehen hwndert yar, vnd yn dem tzehenten yar, an sand Augwssty tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 257 (S 167), S. 269-271