Wir Johanns von Gots genaden abbt zw Lambach bekennen mit dem prieff, das fur unns kommen ist Magdalena, Wolfganngen weyllent am Allramsperig gesessen saling witib, und hat mit wolbedachtem muet und guetem willen rechtt und redlichen verkawfft und zw kawffen geben all ir eribschafft und gerechtigkaytt, so sy gehabt hat an dem halbm guet am Allramsperig in Kirichdorffer pfarr gelegen, das ir dann ubergeben und vermacht ist von dem vorbenantn Wolfganng, ierem hawswirt saling, des sy unns erweyst hat mit prieflicher urkund von unnserm vorsedl abbt Thaman saliger gedachtnuss awsganngen, und hat die zw kawffn geben Andre dem Frechen in der Pewnt dietzeyt gesessen, seiner hawsfrawn Marigrethn und iren paiden eribm umb ain sum gellts, der sew von in ganntz und gar awsgerichtt und betzallt worden ist zw rechten tagen an allen abganng und schadn. Den andern halbm taill in dem vorbenantn guet mit seiner zuegehorung hat die bemellt Marigreth von Anna irer swesster saling ereribt, des sy unns auch erweyst hat mit prieflicher urkund von unnser vorsedl abbt Thaman saliger gedachtnuss auch awsganngen, und pat uns mit dienmuettigem vleyss, denselben iren halben ereribtten tayll ir und irem vorberurten hawswirt dem Andre und iren paiden eribm zwsambt dem vorgenantn irem kawfften taill genadigklich geruechten zu verleichen. Allso haben wir in dem yetz genantten Andre, seiner hawsfrawn Marigrethn und iren paiden eribm die vorgemellt eribschafft und gerechttigkaytt an dem obbenantn guet am Allramsperg mit aller seiner zuegehorung bestatt und verlichen, was wir in rechtlichen daran bestattn und verleichen sullen oder mugen, doch das man unns und unnserm gotshaws alle jar jarlichen zw unnser lieben frawntag der dinsttzeit davon raichen und dien soll sechtzigk Wienner pfenning, zw dem prehentag zwaintzigk Wienner pfening zw pawstewr, zw sand Joringtag zehen Wienner pfening ze vogtstewr. Es ist auch die vorgenant Magdalena fur sich und all ir eribm der vorbenantn eribschafft und gerechttigkait an dem obberurttn halbm guet am Allramsperig mit seiner zuegehorung des obbenantn Andre, seiner hawsfrawn Marigrethn und irer paider eribm recht gewern und furstant fur all rechtlichew ansprach, wo und wan in des mit recht, nott und durfft beschiecht, alls dan solichs kawffs und lanndes ob der Enns rechtt ist. Wir offen auch, das sew kainerlay wandlung damit nicht haben sullen in kainerlay weys an unnser handt und guetem willen, und sullen unns auch alles das davon leiden und dulden, das ander unnsers gotshawss eribler und hindersassen gein unns leydent und duldent unvertzigen unnsers gotshawss rechtn in allen sachen. Zw urkund geben wir in des allso den offen prieff, besiglt mit unnserm anhanngundn insigl. Geben alls man zallt nach Krisstii gepurde viertzehenhundert jare und darnach im newnundsybmtzigkissten jare am erichtag nachst nach sannd Jacobstag des heyligen zweliffpoten.