Wir Johanns von Gots genaden abbt zw Lambach bekennen mit dem prieff, das fur unns komen ist Andre Koch am Stadl vormalln unnser diener, und hat mit wolbedachtem muet und guetem willen rechtt und redlichen verkawfft und zw kauffen geben all sein eribschafft und gerechttigkait, so er gehabt hat an dem guetlein zw Trawn mit seiner zuegehorung gelegen in Widemspekcher pfarr, und ist eribrechtt von unss und unnserm gotshaws, das er dann kewflich in sein gwalltsam pracht hat von Magdalena, Wolfganngen Guldein zw Trawn hawsfraw, die unns das auch aufgeben hat, und hat das zw kawffn geben Wolfganngen Pirhinger, purger zw Lambach und Thorothea seiner hawsfrawn und iren paidn eribm umb ain sum gellts, der sew von in ganntz und gar ausgericht und betzallt worden sein zw rechtten tagen an allen abganng und schadn. Allso haben wir in dem yetz genantn Wolfganng, seiner hawsfrawn Thorothea und iren paidn eribm das vorbenant guetl zu Trawn mit aller seiner zuegehorung bestat und verlichen, was wir in rechtlichen daran bestatten und verleichen sullen oder mugen, doch das sew unns und unnserm gotshaws all jar jarlichen davon raichen und dien sullen nach innhallt, lawt und sag unnsers gotshawss urbarpuech. Es ist auch der vorbenant Anndre Koch fur sich und all sein eribm der vorbenantn eribschafft und gerechttigkait an dem obbenantn guetlein zu Trawn des vorbestimbtn Wolfganng, seiner hawsfrawn Thorothea und irer paider eribm recht gewern und furstanndt fur allew rechtlichew ansprach, wo und wann in des not und durfft beschiecht mit dem rechtn, alls dann solhs kawffs und lanndes ob der Enns recht ist. Wir offen auch, das sew kainerlay wanndlung damit nicht haben sullen in kainerlay weis an unnsers hanndt und gueten willen, und sullen unns auch alles das davon leyden und dulden, das ander unnsers gotshawss eribler und hindersassn gein unns leydent und duldent unverczigen unnsers gotshawss rechtn in allen sachen. Zw urkund geben wir in des allso den offen prieff, besigelt mit unnserm anhanngunden insigl. Der prieff ist geben nach Krisstii gepurde viertzehenhundert jare und darnach im newnundsybmtzigkissten jare an mantag vor sand Veytstag des heyligen ritter.