Wir Johanns von Gots genadn abbt zw Lambach bekennen mit dem prieff, das fur unnsern anwallt und verweser prueder Panngraczn unnsern keldner in unnserm abwesen komen sein Barbara, Thaman von Getzing elichew hawsfraw, Mert und Jorig geprueder und Hannsn weillent auff dem Egk gesessen saling sun, und haben mit wolbedachttem muet und guetem willen recht und redlichen verkawfft und zw kawffen geben all ir erbschafft und gerechttigkait, so sew gehabt haben an dem viertaill an der huebm awff dem Egk in Megkenhofer pfarr gelegen, und ist eribrecht von unns und unnserm gotshaws, des wir erweist sein mit prieflicher urkund von unnserm vorsedel abbt Symon und dem ganntzn convent, und haben die zw kawffen geben irem lieben vetern, prueder, swager und muemen Wolfganngen, der yetz hewslich darauff sytzt, seiner hawsfrawn Marigrethn, Lienhartn Sneider zw Puebmdorff, Kathrein seiner hawsfrawn und allen iren eribm umb ain sum gellts, der sew von in ganntz und gar awsgericht und betzallt worden sein zw rechtn tagen ahn allen abganng und schaden. Allso haben wir in dem yetz benantn Wolfganngen, seiner hawsfrawn Marigrethn, Liennhartn Sneider, seiner hawsfrawn Kathrein und allen iren erbm die vorgenant eribschafft und gerechttigkait an dem obbenantn viertaill in oder auff der bemellten huebm bestat und verlichen, was wir in rechtlichen daran bestatten und verleichen sullen oder mugen, doch das man unns und unnserm gotshaws alle jar jarlichen davon raichen und dien sullen nach innhallt, lawtt und sag des allten eribprieffs, so uber der vorbenantn huebm awsganngen, und unnsers gotshaws urbarpuech. Es sein auch die vorbenantn Barbara, Mert und Jorig fur sich und all ir eribm der vorbenantn eribschafft und gerechtigkaitt an dem obbestymbtn viertaill mit seiner zuegehorung des offtgemelltn Wolfganng, seiner hawsfrawn Marigrethn, des vorbenantn Lienhartn, seiner hawsfrawn Kathrein und aller iren eribm recht gewern und furstanndt fur allew rechtlichew ansprach, wo und wan in des mit recht, nott und durfft beschiecht, alls dann solhs kawffs und lanndes ob der Enns recht ist. Wir offen auch, das sew kainerlay wanndlung damit nicht haben sullen in kainerlay weis an unnser hanndt und gueten willen, und sullen unns auch alles das davon leyden und duldn, das annder unnsers gotshawss eribler und hindersassen gein unns leydent und duldent unverczigen unnsers gotshawss rechtn in allen sachen. Zw urkund geben wir in des allso den offen prieffe, besigllt mit unnserm annhanngundn insigl. Geben nach Krissti gepurde viertzehenhundert jare und im newnundsybmtzigkissten jare an sand Mathyasstag des heyligen zwelyffpotn.