Fridreich von Gots gnaden romischer kaiser etc.

Ersamer [geist]licher lieber andechtiger. Als der Rubikch und annder aus Behem bey Greyn [...] gemacht [da]fur sich dann etlich unser lanndtleut ob der Enns mit unserm lieben getreu[en ...] Bernharten von Scheffenberg unserm veldhaubtman ob der Enns gelegert haben, die [...] veindt h[...]nnden ze bringen, wann aber damit die intzug aus Behem nit auffgehebt werden, sonnder die veindt noch fur und fur heraus in unser furstentumb Osterreich under und uber der Enns ziehen, emphlehen wir dir ernstlich und wellen, das du dein lewt und diener ze rossen und ze fuessen auff das maist und sterkchist du magst mit wegen und in annder weg als in veld gehort zugericht zu dem benanten unserm veldhaubtman an verziehen in veld schikchest ze helffen, solich intzug ze wern und den veindten mit veldgeleger oder in annder weg, wie dann des derselb unser veldhaubtman mit anndern unsern lanndtlewten, so wir auch auffervordert haben ainig und fur uns und lanndt und lewt am pesten und nutzisten wierdet widerstannd ze tun, und sey darin nicht sawmig, als du uns, dirselbs, lannden und lewten des schuldig bist, daran tust du unser ernstliche maynung. Geben zu der Newnstat am phintztag vor dem heiligen phingstag anno domini etc. lxxvi^o unsers kaisertumbs in funffundzwaintzigisten jare.