Wir Johanns von Gottes gnaden abbt zw Lambach bekennen mit dem brief, das fur uns komen ist Dorothea, weylent Peter Tenngk im Fluchtwang saligen witib, und hat mit wolbedachtem muet und guetem willen recht und redlichen abtretten und ubergeben irer lieben tochter Margretn, Casparn Gartner, burger zw Lambach icz eleiche hausfrau, und allen iren erben dy hueb zw Obenhardarn im Dorff mit irer zuegehorung, gelegen in Swannser pfarr und erbrecht ist von uns und unserm gozhaus, des wir erweist warden sein mit brieflicher urkund, ausganngen von abbt Johannsen saliger gedachtnuss. Also haben wir der iezgenanten Margrettn und iren erben die gemelt hueb mit irer zuegehorung zw rechtem erbrecht bestatt und verlichen, was wir ir rechtleichen daran bestatten und verleichen sullen oder mugen, doch das man uns und unserem gozhaus alle jar jarlichen davon raichen und dien sol an unser frawntag der dinstzeit funff schilling allter Wienner pfenning, an dem prehentag ain halb pfundt Wienner pfenning ze pawstewr, zw sand Michelstag zehen pfennig ze weinfuer, an sand Jorigentag zehen pfenning ze vogtstewr, ze unser frawntag sechs huener. Es ist auch die obgenant Dorothea fur sich und all ir erben der bemeltn hueb mit irer zuegehorung der beruerten irer tochter Margretten und irer erben recht gewern und furstannt fur alle rechtleiche ansprach, wo und wann in des nott und durfft beschiecht mit dem rechten, als dann solichs abtrettns, ubergebens und lanndes ob der Enns recht ist angevar. Wir offenn auch, das sew kainerlay wanndlung damit nicht haben sullen in kainerlay weiss an unnser hannt und gueten willen, und sullen uns auch alles davon leiden und dulden, das ander unsers gozhaus erbler gein uns leiden und dulden unvertzigen unsers gozhaus rechten in allen sachen. Zw urkund geben wir in des also den offenn brieff, besigeltn mit unserm anhanngunden innsigl. Geben als man zallt nach Cristi gepurd vierzehnhundent jar und darnach im vierundsybenzigisten jar an sambztag vor sand Symons und Judastag der heyling zwelfpotten.