Venerabilibus ac religiosis patribus et fratribus domno Johanni abbati, Wolfgango priori totique conventu monasterii sancti Kiliani in Lambaco, ordinis sancti Benedicti, Pataviensis dyocesis. Nos Kaspar prepositus, Thomas decanus totusque conventus monasterii domus sancti Floriani ad Sanctumflorianum ordinis sancti Augustini canonicorum regularium dyocesis eiusdem cum sincere caritatis affectu salutem in Domino perhenniter adipisci. Quia mediante caritate, que vinculum perfeccionis ab apostolo predicatur membra singula in corpore sancte ecclesie sibi invicem coniunguntur et Christo suo capiti ad percipiendam per ipsum et in ipso gratiarum spiritualium uniuntur tanto liberius atque libentius sinum caritatis in ampliande confraternitati consorcium dilatamus, quanto ad participacionem fructus huiusmodi ferventius anhelamus. Unde vestrarum caritatum devotis precibus ac famosa religiositate moti matura deliberacione prehabita plene confraternitatis consortium omnium scilicet bonorum participacionem in missis, oracionibus, elemosinis, abstinentiis et vigiliis ac aliis virtutum exerciciis, que divina clementia per presentes nos et successores nostros in dicto nostro monasterio sancti Floriani dignabitur operari, vobis ac successoribus vestris tenore presentium in vita pariter et in morte libere concedimus, adicientes nihilominus, quod cum obitus fratris unius aut plurium predicti monasterii vestri professi vel professorum nobis intimatus fuerit, vigilias et missam defunctorum iuxta consuetudinem nostri monasterii persolvemus, sed et singuli sacerdotes missas legentes singulas missas, clerici vero missas non legentes, officium defunctorum totum, vesperas scilicet et vigilias novem leccionum cum laudibus, conversi quoque singuli centum pater noster cum totidem ave Maria in remedium animarum eorundem dicent, nominaque illorum nostris faciemus inscribi kalendariis mortuorum. In quorum omnium testimonium et robur hanc nostram paginam sigillis nostris munitam vobis prefatis confratribus nostris tradere decrevimus. Datum in dicto nostro monasterio sancti Floriani duodecima die mensis aprilis anno Domini millesimo quadringentesimo septuagesimo quarto.