Von der orgel wegen

anno Domini etc. lxviiijo in die s. Margarete virginis hat domnus abbas Lambacensis andingt zu machen ain organum an maister Hannsen Reicher in solcher maynung:

Item domnus abbas sol kauffen und dargeben allen zeug, das ist zyn, bley, holtz und annderley, was darzu not ist.

Item, es ist abgeredt warden von des solds oder lewns wegen also: Wann der bemelt maister Hanns das werch der argel nw gantz berait und gesetzt hat, so wellen und sullen sy sich der vorgemelt herr und abbt zu Lambach und auch maister Hanns miteinannder frewntlich und guetigkleich verainn umb den sold, den man maister Hannsen hinaws geben sol umb sein arbayt, kunsst und mue, also das derselben schatzung der herr von Lambach beleiben wil bey dem bemelten maister Hannsen und auch der bemelt maister Hanns herwider umb beleyben wil bey dem von Lambach. Beschech aber, das sy in den dingen ettwevil zwayg wurden gegen annder, so sullen in den sachen mittler sein her Hanns des Leroch vetter, und her Steffan der kellner, oder ain annder von convennt oder mer die ya baiden darzw wol gevallen.

Item dy weil der bemelt maister Hanns an dem werch hie arbayt, sol ym der abbt zu Lambach dy phrundt geben und auch ainen knaben, also das er dieselb phrundt bey des nichter tysch haben und besuchen sol, und zu dem fruemal sol man ym geben ain halbe wein, desgleich auch zu dem nachtmal. Auch ob er wein zwischen malczeit zu zeiten ainen trunkch ervodret, den wil man ym auch geben.

Item er hat auch an meinem herren begert mit diemutigkait, ob zu ym ain erwar gasst kam, und er davor in dem markcht kainn guten wein zu kauffen fundt, das man ym dann seinem gasst ainn trunkch raichet, das wolt er dann in sunderhait umb meinem herren und das gotshaws verdienn und widerkeren.