Wir Thoman von Gottes genaden abbt ze Lambach bekennen mit dem brief, das fur uns komen ist Ulreich ze Herrenroch und hat mit wolbedachtem mut und gutem willen recht und redleichen verkaufft dy halb wisen in der Praitenaw, gelegen in Widemspekcher pharr und gehort in unnsern hof in der Praitenaw, und kawfleichen in sein gwaltsam bracht hat von Anna der Penningerin, und hat dy ze kauffen gegeben Wolfganngen dem Murren ze Freyhaim und allen seinn erben umb ain sum gelts, der er gantz und gar ausgerichtt und beczalt worden ist zu rechtten tagen an allen schaden. Also haben wir im dem yetz benanten Wolfganngen und allen sein erben dy obgenanten halb wisen mit aller zugehorung bestett und verlichen, was wir in rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon raichen und dienn sol zu unnser lieben frawntag der dienstzeit funf und vierczige Wiener phenning. Es ist auch der obgemeltt Ulreich und all sein erben der bemeltten halben wisen mit aller irer zugehorung des berurten Wolfganng Muerren und aller seiner erben rechtt gwern und furstandt fur all rechtleiche ansprach, wo und wann in des not und durfft beschiecht mit dem rechten, als dann solhs kauffs und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weis an unnser handt und gutem willen, und sulln uns auch alles das davon leyden und dulden, das annder unnsers gotshauss erbler gein uns leydent und duldent unverczigenn unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburde in dem vierczechenhunndertundzwaynundsechczigisten jaren an eritag vor sannd Jorigentag in den heiligen osterveirtagen.