Wir Thoman von Gottes genaden abbt ze Lambach bekennen mit dem brief, das fur uns komen ist Wolfganng Scherhewffl und hat mit wolbedachtem mut und gutem willen recht und redleichen gemacht und geben seiner lieben eeleichen hausfrawn Margrethen vierczechen phundt phening munss diezeit gib und geb im landt ob der Enns auf seiner erbschaft und gerechtikait, so er hat an dem gut, genant das Hetzelgut vor dem Hard, gelegen in Gunskircher pharr, das erbrecht ist von uns und unnserm gotshaus, darzu halbe vorunde hab solher maynung, get der benant Wolfganng mit tod ee ab wenn sein gemeltte hausfraw, dann so sol das vorberurt gemacht gelt und halbe vorunde hab gevallen und beleiben der obgenanten seiner hausfrawn Margrethen und allen iren eriben angever. Get sy aber mit tod ee ab, wenn ir bemeltter man, dann so sol das vorberurt gemachtt alles gelt und halbew vorunde hab gevallen und beleiben irem benanten mann Wolfganng und allen sein erben alles getreuleich und ungeverleichen. Wir offen auch, das sy kainerlay wanndlung damit nicht haben sullen in kainerlay weis an unnser handt und gutem willen, und sulln uns auch alles das davon leyden und dulden, das annder unnsers gotshaus erbler gein uns leydent und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhangundem insigel. Geben als man zalt nach Kristi geburde in dem vierczechenhunndertundzwayundsechczigisten jaren an phintztag nach sannd Benedictentag des heiligen abbt und peichtiger vor Letare in der vasten.