Philippus miseratione divina tituli sancti Laurentii in Lucina presbyter cardinalis dilecto in Christo Johanni Kimplidasen presbytero Pataviensis diocesis salutem in Domino. Solet annuere sedes apostolica piis votis et honestis petentium precibus maxime ubi salus requiritur animarum favorem benivolum impartiri. Cum igitur ex parte tua nobis fuerit humiliter supplicatum, ut in anime tue solatium eligendi confessorem ydoneum, tibi licentiam concedere dignaremur, nos tuis supplicationibus favorabiliter annuentes auctoritate domni pape cuius penitenciarie curam gerimus et de eius speciali mandato super hoc vive vocis oraculo nobis facto, devotioni tue concedimus quatenus licat tibi ydoneum et discretum presbyterum in confessorem eligere, qui super pecatis que sibi confiteberis nisi talia fuerint propter que merito sit sedes consulenda predicta tibi provideat eadem auctoritate de absolutionis debite beneficio et penitentia salutari quamdiu vixeris quotiens fuerit oportunum. Vota vero peregrinationis et abstinentie, si qua emisisti, que comode servare non potes ultramarino beatorum Petri et Pauli atque Jacobi apostolorum votis duntaxat exceptis commutet tibi idem confessor in alia opera pietatis. Datum Senis sub sigillo officii penitentiarie xi kal. martii pontificatus domni Pii pape ii anno secundo.