Wir Albrecht von Gots gnaden ertzhertzog ze Osterreich, ze Steir, ze Kernden und ze Krain, grave ze Tyrol etc. bekennen fur uns und unser erben, daz wir dem ersamen gaistlichen unserm lieben andechtigen Thoman abbt zu Lambach, seinem convent und iren nachkomen daselbs die gnad getan haben, waz sy nw hinfur weins in irem closter, dartzu in den nagsten zwain tafern bey demselben irm gotshaws gelegen, die sy und ir nachkomen dartzu nutzen und geprauchen, weins schenkhen werden, daz wir sy an den enden allen an solhen schenkwein fur unsern ungelt gefreyet haben und freyen wissenlich mit dem brief auf uns und unserer erben widerrufen. Davon gepieten wir allen unsern ungeltern gegenwurtigen und kunftigen und wellen ernstlich, daz sy den egenanten abbt, sein gotshaus und ir nachkomen bey solher unserer freyhait und gnade bleiben lassen, das ist gantzlich unser maynung. Mit urkund des briefs, geben ze Lynntz an sant Thomas abent des zwelfpoten nach Cristi gepurde viertzehenhundert und in dem newnundfunftzigisten jaren.