Johannes de Castilione Dei gratia episcopus Papiensis et comes sanctissimi domini nostri pape referendarius ac ipsius et sedis apostolice in Alamania cum potestate legati de latere nuncius et orator universis christifidelibus ad quos presentes litere nostre devenerint salutem in Domino sempiternam. Splendor paterne glorie qui sua mondum illuminat ineffabili claritate pia vota fidelium de ipsius clementissima maiestate et misericordia sperantium tunc benigno favore prosequitur cum ipsorum humilitas sanctorum precibus adiuvatur, cupientes igitur, ut monasterium Lambacense ordinis sancti Benedicti et parrochialis ecclesia sancti Johannis dicti loci ac cappella beate Marie Magdalene a dicto monasterio dependens Pataviensis diocesis devotis et congruis frequententur honoribus et ut christifideles devocionis causa confluant ad eadem quo inibi uberiora causa gratie conspexerint se refectos de omnipotentis Dei misericordia ac beatorum Petri et Pauli apostolorum eius meritis et intercessione ac legacione nostra, qua fungimur auctoritatibus confisi, omnibus et singulis utriusque sexus christifidelibus vere penitentibus et confessis, qui monasterium, parrochialem ecclesiam et cappellam devote visitaverint, prefata in nativitatis, circumcisionis, epiphanie, ascensionis, Penthecostes, corporis Christi, nativitatis, purificacionis, annunciationis, assumpcionis gloriose virginis Marie, Petri et Pauli apostolorum ac Johannis Baptiste patronorum et dedicacionum eorundem et ad reparacionem, calicum, librorum et aliorum ornamentorum divino cultui necessariorum quocienscunque manus porrexerint adiutrices centum dies indulgenciarum de iniunctis eis penitenciis misericorditer in Domino relaxamus presentibus perpetuo duraturis. In quorum fidem presentes per notarium et secretarium nostrum infrascriptum fieri nostrique sigilli rotundi fecimus appensione muniri. Datum in Lambacho Pataviensis diocesis anno Domini milesimo quadringentesimo quinquagesimosexto indictione iiiita, die vero sexta mensis novembris, pontificatus prefati sanctissimi in Christo patris et domini nostri Domini Calisti divina providencia pape tercii anno secundo.