Johannes miseracione divina sancti Angeli sacrosancte Romane ecclesie diaconus, cardinalis per Germaniam, Hungariam regna et terras Thurcis subiectas et illis finitimas apostolice sedis de latere legatus specialiter deputatus, religioso nobis in Christo dilecto abbati monasterii in Lambaco, ordinis sancti Benedicti, Pataviensis diocesis, salutem in Domino sempiternam. Sua nobis dilecti nobis in Christo Marquardus, Johannes et Wolfgangus, laici Pataviensis diocesis peticione monstrarunt, quod alias quidem iudex secularis prefate diocesis, cui predicti exponentes subditi et subiecti tunc erant, quendam laycum de crimine furti apud eum denunciatum detinuit et incarceravit, qui detentus et incarceratus crimen illud omnino negavit, predictus iudex responsione sua non contentus, ipsum per prefatos exponentes torqueri fecit, qui mandatum iudicis exequentes in torquendo modum excesserunt adeo, quod ipse sic per eos tortus post huiusmodi torturam infra tres vel quatuor dies diem vite sue clausit extremum. Cum autem sicut eadem peticio subiungebat ipsi exponentes de morte dicti layci ab intimis doleant nec aliter in mortem dicti layci sint machinati, quam, ut supra expositum est, nobis humiliter supplicari fecerunt, quatenus auctoritate nostre legacionis eis de absolucionis remedio providere digneremur. Nos vero de premissis certam noticiam non habentes ac attendentes, quod sancta mater ecclesia nemini gremium claudit ad se redeunti, discrecioni tue dicta auctoritate nostre legacionis, qua fungimur, in hac parte per hec scripta conmittimus et mandamus, quatenus si premissa per diligentem informacionem veritatis subniti esse repereris, super quo conscienciam tuam oneremus, ipsos Marquardum, Johannem et Wolfgangum et quemlibet ipsorum postquam id humiliter pecierint et hiis omnibus, quibus fuerit satisfaccio impendenda, si non satisfecerunt, satisfecerint conpetenter a reatu homicidii huiusmodi et aliiis peccatis eorum nisi talia fuerint, propter que merito sedes apostolica fuerit consulenda, absolvas hac vice dumtaxat in forma ecclesie consueta et iniungas inde eis et cuilibet ipsorum pro modo culpe penitenciam salutarem quodque de cetero in similibus non excedant, et alia que de iure fuerint, iniungenda que ipsi exponentes adimplere omnimode teneantur alioquin absolucio huiusmodi eis nullatenus suffragetur, in quorum fidem presentes nostras litteras fieri nostrique maioris sigilli appensione muniri mandavimus. Datum Wienne dicte diocesis anno a nativitate Domini millesimo quadringesimo quinquagesimosexto, die vero decimatercia mensis Januarii pontificatus sanctissimi in Christo patris et domini Calisti divina providencia pape tercii anno primo.