Wir Thoman von Gottes genaden abbt ze Lambach bekennen mit dem brief, das fur uns komen ist Hennsel Silber und hat mit wolbedachtem mut und gutem willen recht und redleichen verkaufft all sein erbschaft und gerechtikait, dy er gehabt hat an der Silberhueb gelegen in Puchler pharr, dy erbrecht ist von uns und unnserm gotshaus, und hat dy ze kauffen gegeben seinem lieben vettern Hannsen Silber in der Zerrergrub, seiner hausfrawn Margrethen und iren baiden eriben umb ain sum gelcz, der er gantz und gar ausgerichtt und beczalt worden ist zu rechtten tagen an allen schaden. Also haben wir im, dem yetz benanten Hannsen Silber, seiner hausfrawn und irn baiden erben des obgemeltten Hennsel Silber erbschaft und gerechtikait, so er an der obgenanten hueben gehabt hat, mit aller zugehorung bestett und verlichen, was wir in rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon raichen und dienn sol nach innhaltung des erbbriefs, so uber die gemeltten huben ist lautt und sag. Es ist auch der obenant Hennsel Silber und all sein erben aller seiner erbschaft und gerechtikait, so er an der oberurten hueben gehabt hat, des obgemeltten Hannsen Silber, seiner hausfrawn Margrethen und irer baider erben rechtt gwern und furstandt fur all rechtleichew ansprach, wo und wann in des not und durft beschiecht mit dem rechten, als dann soleichs kauffs und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unnser handt und gutem willen, und sullen uns auch alles das davon leyden und dulden, das annder unnser und unnsers gotshauss erbler gein uns leydent und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburde in dem vierczechenhundertundsechsundfunnffczigisten jaren an sambstag vor Mathei apostoli.