Wir Thoman von Gottes genaden abbt ze Lambach bekennen mit dem brief, das fur uns komen ist Kunrat von Hag anstat sein, seins brueder Ulreichen, des verschriben gwalt er hat, und hat also mit wolbedachtem mut und gutem willen recht und redleichen verkaufft die achczigk phenning gelcz, die sew gehabt habent auf der Strobelmul ze Grunnpach, gelegen in Gunskircher pharr, und hat die ze kauffen gegeben Niklein im Puch, seiner hausfrawn Kunigunden und irn baiden erben umb ain sum gelcz, der er gancz und gar ausgerichtt und beczalt worden ist zu rechtten tagen an allen schaden. Habent sein vettern und muemen der yetz benant Nikel im Puch, Kuntzel ze Palting, Ull ze Velding, Symon daselbs, Margreth ze Spekch, Anna und Jorig, geswistred, und Kuntzel, der vorberurten geswistred swester sun, irr gerechtikait in den vorgemeltten achtzigk pfenning geltz gein dem obenanten Kunraten von Hag und seinem brueder Ulreichen verczigen, [so se]w die bei in daran gehabt habent. So hat sich der Kunrat von Hag anstat sein, seins brueder Ulreichen widerumben [...]erczigen aller irr erbschaft und gerechtikait, die sew auch bei in gehabt habent an der nidern hueben ze Palting. [Also haben] wir im dem obgenanten Niklein im Puch, seiner hausfrawn Kunigunden und irn baiden erben die obgenanten [...]nnig gelcz auf der obgenanten mul bestett und verlichen, was wir in rechtleichen daran bestetten [und verleichen su]llen oder mugen, doch das man uns und unnserm gotshaus all jar jarleichen von der obenanten mul [raichen und dienn] sol nach lautt unnsers gotshauss urbarpuch. Es ist auch der obgenant Kunrat von Hag anstat [sein, seiner br]ueder Ulreichen und irr baider eriben der obenanten achtzigk pfenning gelts auf der oberurten mul des o[benanten] Niklein im Puch, seiner hausfrawn Kunigunden und irer baider erben rechtt gwern und furstandt fur all recht[leichew ans]prach, wo und wann in des not und durfft beschiecht mit dem rechten, als dann soleichs kauffs und lanndes [ob] der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unnser handt und guten willen, und sullen uns auch alles das davon leyden und dulden, als annder unnsers gotshauss erbler gein uns leydent und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigelten mit unnserm anhanngundem insigel. Geben als man zalt nach Kristi geburde in dem virczechenhundertundfunfundfunnffczigisten jaren an eritag an sannd Johannss gotstauffertag ze sunibendtten.