Wir Thoman von Gottes genaden abbt ze Lambach bekennen mit dem brief, das fur uns komen ist Wernczel Sparer und hat mit wolbedachtem mut und gutem willen recht und redleichen gemacht und geben seiner lieben eeleichen hausfrawn Magdalena, Lienhart des wirts zu Wiertinng weyland seligen tochtter, vierczechen phundt phenning zu rechtter morigengab nach dem lanndtsrecht ob der Enns auf aller seiner erbschaft und gerechtikait, so er hat in unnserm markcht und purkchfrid an haws, hofstat, garten mit aller zuegehorung. Also haben wir ir der gemeltten Magdalena das gemelt ir gemacht auf des berurten irs manns erbschaft und gerechtikait bestett und verlichen, was wir ir rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon raichen und dienn sol nach innhaltung unnsers gotshaus urbarpuch. Es ist auch der obenant Wernczel und all sein erben des oberurten gemachts, morgengab auf seiner obgenanten erbschaft und gerechtikait der bemeltten seiner hausfrawn rechtt gwern und furstandt fur all rechtleichew ansprach, wo und wann ir des not und durfft beschiecht mit dem rechten, als dann soleichs gemachts der obgenanten morgengab und lanndes ob der Enns recht ist. Wer auch nagster erb nach des obgemeltten Wernczleins abganng ist, der hat all jar jarleichen losung zu unnser lieben frawntag der liechtmess vierczechen tag vor oder in den nagsten vierczechen tagen hinnach umb dy obenanten sum gelts und nicht umb mer. Wir offen auch, das sy kainerlay wanndlung damit nicht haben sullen in kainerlay weis an unnser hanndt und gutem willen, und sullen uns auch alles das davon leyden und dulden, das annder unnsers gotshauss lewt hie in unnserm markcht und purkchfrid gesessen gein uns leydent und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburde in dem vierczechenhunndertundfunfundfunffczigisten jaren an mantag nagst nach sannd Veitstag des heiligen ritter und martrer.