Wir Thoman von Gottes genaden abbt ze Lambach bekennen mit dem brief, das fur uns komen sinnd Kathrei, Ortleins ze Kurnpach weylandt seligen und yetz Kunczl des Weber hausfraw, und Hennsel, ir und des vorberurten Ortleins seligen sun, und habent also mit wolbedachtem mut und gutem willen recht und redleichen abtreten und ubergegeben das gut ze Kurnpach mit aller seiner zugehorung, gelegen in Reuthaimer pharr, und erbrecht ist von uns und unnserm gotshaus, und habent das ubergegeben irm lieben aydem, swager, tachtter und swester Hainreichen dem Lederer, seiner hausfrawn Barbara und irn baiden erben umb ain sum gelts, der sew gantz und gar ausgerichtt und beczalt worden sind zu rechtten tagen an allen schaden. Also haben wir im dem yeczbenanten Hainreichen, seiner hausfrawn und irn baiden erben das obgenant gut mit aller seiner zugehorung bestett und verlichen, was wir in rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon raichen und dienn sol zu unnser lieben frawntag der dienstzeit achtthalben metzen korn, funffczechen metzen habern und zway huener, zu dem prehentag drey schilling phenig ze paustewr, ain vaschanghenn, zu sannd Jorigentag dreissigk Wienner phenning vogtsteur. Es sind auch die obgenanten Kathrei, ir sun Hennsel und irer baider erben des obgenanten gutz mit aller zugehorung sunder irr gerechtikait, so sew daran gehabt habent, des obgenanten Ledrer, seiner hausfrawn und irer baider erben rechtt gwern und furstandt fur all rechtleichew ansprach, wo und wann in des not und durft beschiecht mit dem rechten, als dann soleichs abtretens, ubergebens und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unnser handt und gutem willen, und sullen uns auch alles das davon leiden und dulden, das annder unnsers gotshauss erbler gein uns leident und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburde in dem vierczechenhundertundfunffundfunffczigisten jaren an freitag nagst nach sannd Mathias tag.