Venerabilibus ac religiosis in Christo patribus et fratribus domino Thome abbati totique conventui monasterii sancte Marie virginis ac sancti Kiliani sociorumque eius Lambacensis, ordinis sancti Benedicti, Pataviensis diocesis, [nos fra]tres Symon abbas, Sebastianus prior totusque conventus monasterii sancti Michahelis archangeli Lunelacensis ordinis et diocesis eoru[ndem] cum sincere caritatis affectu salutem in Domino perhenniter adipisci. Quia mediante caritate, que vinculum perfeccionis ab apostolo predicatur, membra singula in corpore sancte ecclesie sibi invicem coniunguntur et Christo suo capiti ad percipiendum per ipsum et in ipso graciarum spiritualium influenciam uniuntur, tanto liberius atque libencius sinum caritatis in ampliande confraternitatis consorcium dilatamus, quanto ad participacionem fructus huiusmodi fervencius anhelamus, unde vestrarum caritatum precibus et religiositate mote mature deliberacione prehabita plene confraternitatis bonorum scilicet omnium consorcium et communionem in missis et oracionibus, elemosinis, abstinenciis, vigiliis ac aliis virtutum exerciciis, que divina clemencia per presentes nos successoresque nostros in dicto monasterio Lunelacensi dignabitur operari, vobis ac successoribus vestris tenore presencium libere concedimus adicientes, quod cum obitus fratris unius vel plurium predicti monasterii vestri professi vel professorum nobis intimatus fuerit, vigilias et missam defunctorum iuxta conswetudinem nostri monasterii persolvemus, sed et singuli sacerdotes missas legentes singulas missas, clerici vero missas non legentes officium defunctorum totum vesperas scilitet et vigilias novem leccionum cum laudibus, conversi quoque centum Pater noster cum totidem Ave Maria in remedium animarum eorundem dicent. In quorum omnium testimonium et robur hanc paginam sigillis nostris munitam prefatis fratribus nostris tradere decrevimus. Datum in nostro Lunelacensi monasterio anno Domini millesimo quadringentesimo quinquagesimotercio die vicesimaoctava mensis iunii.