Wir Thoman von Gottes genaden abbt ze Lambach bekennen, das fur uns komen ist Helmel auf der Rewt und hat mit wolbedachtem mut und gutem willen recht und redleichen gemacht und geben seiner lieben eleichen hausfrawn Elsbethen, Ortolfs des Kampner ze Selling tochtter, funff phundt phenning zu rechtter morigengab und funff phundt pfenning zu rechttem heiratgut auf seinem jeuch akcher gelegen hie in unnserm markchtveld gein Niderswaig bei dem jeuch akcher, genant Hasenpartz, und des Krenmulner akchern. Also haben wir ir der benanten Elsbethen das gemeltt ir gemacht, morigengab heyratgut, yedts nach dem lantsrecht ob der Enns auf dem berurten jeuch akcher und seiner zugehorung bestett und verlichen, was wir ir rechtleichen daran bestetten und verleichen sulln oder mugen, doch das man uns und unnserm gotshaus all jar jarleichen davon raichen und dienn sol nach innhaltung des briefs, so uber das gemeltt jeuch akcher ist lautt und sag. Es ist auch der obgenant Helmel und all sein erben des obenanten gemachtz, morigengab, heyratgutz auf dem oberurten jeuch akcher und aller seiner zugehorung der obgenanten Elsbethen rechtt gwern und furstandt fur all rechtleichew ansprach, wo und wann ir des not und durft beschiecht mit dem rechten, als dann soleichs gemachts, morigengab, heiratgutz und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weis an unnser hanndt und gutem willen, und sulln uns auch alles das davon leyden und dulden, das annder unnsers gotshauss lewt hie gesessen gein uns leident und duldent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburde in dem vierczechenhundertunddreinundfunffzigisten jaren an sambstag an sannd Johannsabent ze sunibendtten.