Wir Thoman von Gottes genaden abbt ze Lambach bekennen mit dem brief, das fur uns komen ist Wenczel Schawr und hat mit wolbedachtem mut und gutem willen recht und redleichen verkaufft ain hofstat gelegen ze Waidhausen in Welser pharr, genant der Lotersperg, und ain wisen gelegen zwischen des Herczogen auf der Haid und des Peltz Ulleins wisen bey dem Urfarweg ze Weichsselpawm und ainn werd gelegen zwischen dem Pruttentantz und des Vischer werd, yedtz mit seinn zugehorungen als es mit marichen, zewnn und graben umbfanngen ist, und hat dy ze kauffen gegeben Anndree dem Kramer, burger ze Wels, seiner hausfrawn Anna und irn baiden erben umb ain sum gelcz, der er gantz und gar ausgericht und beczalt worden ist zu rechtten tagen an allen schaden. Also haben wir im dem yetz benanten Anndree, seiner hausfrawn und irn baiden erben die oberurten stukch hofstat, wisen, werd mit allen irn zuegehorungen zu rechttem kauf bestett und verlichen, was wir in rechtleichen daran bestetten und verleichen sulln oder mugen, doch das man uns und unnserm gotshaus von der hofstat all jar jarleichen raichen und dienn sol zu unnser lieben frawntag der dienstzeit funnffczigk Wienner phenning und sechs huener, zu dem prehentag zwaintzigk Wienner phenning ze paustewr, zu sannd Jorigentag zechen phenning ze vogtstewr und zu sannd Michelstag zechen phenning ze weinfur. Dann von der wisen zu dem benanten unsern frawntag auch zechen phenning und vom werd funnffczechen pfenning. Es ist auch der obgenant Schawr und all sein erben der obenanten hofstat, wisen, werd, yedtz mit aller seiner zugehorung des berurten Andree Kramer, seiner hausfrawn und irer baider eriben rechtt gwern und furstanndt fur all rechtleiche ansprach, wo und wann in des not und durft beschiecht mit dem rechten, als dann soleichs kauffs und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unnser hanndt und gutem willen, auch dy vorberurten stukch stiftleich und pewleichen legen und halten und alles das gein uns leyden und dulden mit stewr und in anndern wegen, das annder unnser und unnsers gotshauss eribler gein uns leydent und duldent und nach lautt des briefs uns darumben gegeben unverczigen unnsers gotshauss rechten in allen sachen. Ze urkund geben wir in des also den offen brief, besigeltem mit unnserm anhanngundem insigel. Geben als man zalt nach Kristi geburde in dem vierczechenhunndertunddreynundfunnffczigisten jaren an mitichen nagst nach sannd Jacobstag.