Wir Thoman von Gottes genaden abbt ze Lambach bekennen mit dem offenn brief von solicher spruch wegen, so Jorig der Perkchaimer zu uns vermaint ze haben, uns darumben in die haubpmanschaft geladen hat, desgleichen wir den bemeltten hern Jorigen auch in dy haubpmanschaft geladen haben umb unnser spruch, so wir widerumben auch zu im haben. Auch nach innhaltung ladung haben wir maister Hannsen, unnserm prior, weiser des briefs, soleich hern Jorigen und unnser spruch, so dann ain tail gein dem anndern vermaint ze haben und auch hat nach innhaltung unnser baider taillen ladungen bepholhen ze suchen und zu verantwurtten. Darumben geben wir im des also unnsern gannczen und volligen gwalt wissentleichen in kraft des briefs, soleich spruch an unnser stat ze suchen und zu verantwurtten, wie sich das begibtt in der gutikait oder mit dem rechten zu gwinng oder zu verlust in aller mass und gerechtikait, als ob wir selbs da weren. Mit urkund des briefs, den wir also darumben geben, besigelt mit unsserm aufgedrukchttem insigel. Zu mererr zeugnuss haben wir vleiss gebeten den edeln vessten Veiten den Mulbannger ze Neitharting, das er sein insigel zu unnserm auf den brief gedrukcht hat, im und allen seinn eriben an schaden. Geben als man zalt nach Kristi geburde in dem vierczechenhunndertunddreinundfunnffczigisten jaren an mantag Ruperti episcopi.