Venerabilibus ac religiosis in Christo patribus et fratribus domno Thome abbati totique conventui monasterii Lambacensis, ordinis sancti Benedicti, Pataviensis dyocesis, nos fratres Cristannus abbas, Stephanus prior totusque conventus monasterii beatorum apostolorum Petri et Pauli in Mellico, Romane curie sine medio subiecti, ordinis et dyocesis eorundem cum sincere karitatis affectu salutem in Domino perenniter adipisti. Quia mediante karitate, que vinculum perfecionis ab predicta membra singula in corpore sancte ecclesie sibi invicem coniunguntur et Christo suo capiti ad percipiendam per ipsum et in ipso graciarum spiritualium influenciam uniuntur, tanto liberius atque libencius sinum karitatis in ampliande confraternitatis consorcium dilatamus, quanto ad participacionem fructus huiusmodi fervencius anhelamus. Unde vestrarum caritatum precibus et relligiositate moti matura deliberacione prehabita plene confraternitatis bonorum scilicet omnium consortium et communionem in missis, orationibus, elemosinis, abstinenciis et vigiliis ac aliis virtutum exerciciis, que divina clemencia per presentes nos et successores nostros in dicto monasterio Mellicensi dignabuntur operari, vobis et successoribus vestris tenore presencium libere concedimus adicientes, quod cum obitus fratris unius vel plurium predicti monasterii vestri professi vel professorum nobis intimatus fuerit, vigilias et missam defunctorum iuxta consuetudinem nostri monasterii persolvemus, et singuli sacerdotes missas legentes singulas missas, clerici vero missas non legentes officium defunctorum totum, vesperas scilicet et vigilias novem lectionum cum laudibus, conversi quoque centum Pater Noster cum totidem Avemaria in remedium animarum eorundem dicent. In quorum omnium testimonium et robur hanc paginam sigillis nostris munitam prefatis fratribus nostris tradere decrevimus. Datum in monasterio nostro prefato anno Domini millesimoquadringentesimo quadragesimoseptimo die vicesima mensis ianuarii.