Wir Thoman von Gottes genaden abbt ze Lambach bekennen mit dem brief, das fur uns komen sind Peter und sein swester Angnes, Symon des Lemerleins an der Hub hausfraw, Jorigen von Teysing seligen kinder, und habent uns furbracht, wie sew ir swester Margrethen dem Jannsen, Jacoben von Palnstorf sun verheiratt und zu ainer eleichen hausfrawn gegeben haben, darzu dem benanten irm geswein und swestern abtreten und ubergegeben ir zwen tail mit aller zugehorung an dem gut zu Oberteysing, gelegen in Rewthaymer pharr umb ain sum gelts, die in der benant ir geswey und swester dafur gegeben und berait ausgerichtt, daran sew yetz und hinfur ain volligs gantz benuegen haben, dann ain drittail sey auch voraus der gemeltten Margrethen an dem berurten gut ir rechts vaterleichs erib, und baten uns vleissig, das wir nun das benant gut mit aller zugehorung dem obgenanten irm geswein und swestern Jannsen, seiner hausfrawn Margrethen und irn baiden erben geruchten zu bestetten und verleichen, das wir also getan haben und auch tun wissentleichen in kraft des briefs, was wir in rechtleichen daran bestetten und verleichen sullen oder mugen, doch das man uns und unserm gotshaus alle jar jarleichen davon raichen und dienn sol nach innhaltung unsers gotshauss urbarpuch lautt und sag. Es sind auch dy obgemeltten geswistred Peter und Angnes und all irer eriben der benanten irr zwayer tail mit aller zugehorung an dem oberurten gut des benanten irs geswein und swestern Jannsen und Margrethen und irer baider eriben rechtt gwern und furstanndt fur all nechtleichew ansprach, wo und wann in des not und durfft beschiecht mit dem rechten, als dann solhs abtretens, ubergebens, erbrechtz und lanndtz ob der Enns recht ist. Wir offen auch, daz sy kainerlay wanndlung damit nicht haben sulln in kainerlay weis an unser hanndt und gutem willen, und sulln uns auch alles das davon leyden und dulden, das annder unsers gotshauss eribler gein uns leydent und duldent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburde in dem vierczechenhunndertundsechsundvierczigisten jaren an mantag nach Invocavit in der ersten vastwochen.