Wir Thoman von Gottes genaden abbt zu Lambach bekennen mit dem brieve, das fur uns komen ist Wolfganng Smadel und hat uns furbracht ainen gerichtsbrief, ausganngen von unserm richtter dem edeln Erasem den Uczinger, damit underweist solicher meynung, wie im Stephan Vondel seliger suldig sey gewesen, dieselb geltschuld sull er haben nach der Barbara des benanten Vondleins saligen witib und nach Ullreichen dem Schopper auf ainer wisen, gelegen in unserm purkchfrid am Stadel zu Nidernspitz zwischen dem Kegelperig und der Agerlewtten. Er hab auch ain sum gelcz hinaus mussen geben nach rat frumer lewt zu der geltschuld, die im der benant Vondel selig suldig ist gewesen. Bat uns der gemellt Smadel, das wir im, seiner hausfrawn Kathrein, und allen sein eriben nach solicher hanndlung und underweisung die berurten wisen geruchten zu bestatten und verleichen, daz wir also getan haben und auch tun wissentleichen in kraft des briefs, was wir in rechtleichen daran bestatten und verleichen sulln oder mugen, doch daz man uns und unserm gotshaus all jar jarleichen davon raichen und dienn sol zu sannd Michelstag zu purkchrecht funffczechen Wienner phenning. Wir offen auch, daz sy kainerlay wanndlung damit nicht haben sulln in kainerlay weys an unser hanndt und gutem willen, und sulln uns auch alles das davon leyden und dulden, daz annder unsers gotshauss lewt gesessen in unserm purkchfrid am Stadel gein uns leydent und duldent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburd in dem vierczechenhundertundvierundvierczigisten jaren an mantag nach sannd Paulstag bekerung.