Peter Rencz decretorum licenciatus, reverendissimi in Christo patris et domni domni Leonardi episcopi Pataviensis commissarius generalis, universis et singulis plebanis, parrochialium ecclesiarum rectoribus seu locatenentibus eorundem per archidiaconatum Pataviensem ubilibet constitutis, ad quos presentes literae pervenerint, salutem in Domino. Cupientes christifideles indulgenciarum et peccatorum remissionibus ad devocionis zelum et pietatis opera, quibus divine reddantur apciores gracie fervencius incitari, cumque cenobium fratrum ordinis sancti Augustini in Schontal, Ratisponensis diocesis, dudum ex invasione nephandorum Wiclefistarum Bohemorum hereticorum per ignis incendia manuum sacrilega hostiliter sit devastatum et destructum nec recuperari potest absque fidelium subvencione, quare vos omnes et singulos supradictos in Domino requirimus caritative et hortamur, et in virtute sancte obediencie districte precipiendo mandantes, quatenus nunnccius seu fratres dicti cenobii, dum ad vos pervenerint caritative pertractetis ac in ambonibus vestris plebi conmisse pie exhortacionis verbo reconmendetis, ut de bonis sibi adeo collatis pia caritatis subsidia pro restauracione prefati cenobii impendant, ut per hec et alia bona opera, que Domino inspirante ad eterna gaudia feliciter mereantur pervenire, presentibus ad annum unum dumtaxat valituris. Datum Patavie die xx mensis ianuarii anno Domini etc. quadragesimoquarto sub officii nostri sigilli impressione.