Ich Anna Steffan des Smid purger zu Swanns eliche hausfrau wechen mit dem offen brieff fur mich und all mein eribn, das ich recht und redleich chawffleich zu chauffen hab gebenn mein geleichen eribtaill halbs gut und halbe mull, so ich gehabt hab amb gut und an der mull zu Mulleitn in Swannser pharr, dem Ull Aussneyder, seiner hausfrau und all irn paidn eriben, enpuet ich obgenant Anna und all mein eriben unserm genadigen hern hern abt Thoman zu Lambach und dem ganczen convent daselbs unser willig und gehorsam dinst. Ir wellt, ir das convent, geben dem benanten Ulreich Aussneyder, seiner hausfraun und all irn paidn eribn brieff und sidel und bestettung tuen umb das obgenant halbs gut und halbe mul zu Mulleitn, das ist mein und aller meiner eribn gutleich will und poett, und wil ich noch all mein eribn euch noch dem convent niymmer darumb zu sprechen noch nymant von unserntwegen. Des zu urchundt gib ich obgenant Anna fur mich und all mein eribn des den offn brieff, verpetschafften mit der erbrn und weyssen Casparn Fleyshacher und Thoman des Smid paid purger zu Swanns ir paider auffgedruchten petschafft, dew ich paid mit vliz darumb gebettn hab, yn und allen irn eribn an schaden, darunder ich mich obgenant Anna verpint fur mich und all mein eriben alles bar und stet zu halten, das an dem brief geschriben stet, der geben ist, do man czalt von Christi gepurd xiiii hundert, darnach im xliiii jare feria sexta ante kathedra Petri.