Alexander miseracione divina titulo sancti Laurencii in Damaso sancte Romane ecclesie presbyter cardinalis, patriarcha Aquilegiensis vulgariter nuncupatus, administrator ecclesie Tridente, perpetuus per sacrosanctam generalem sinodum Basiliensem universalem ecclesiam representantem legatus de latere, per Germanie partes specialiter deputatus duxque Mazovie etc. universis cristifidelibus presentes literas inspecturis. Splendor paterne glorie, qui sua mundum ineffabili claritate illuminat, vota fidelium de clementissima maiestate eius sperancium tunc precipue benigno favore prosequitur cum devota ipsorum humilitas sanctorum meritis et precibus adiuvatur. Cupientes igitur, ut ecclesie sive capella sancte Marie Magdalene in Mornpach, Pataviensis dyocesis congruis frequentetur, honoribus ac ut cristifideles eo libencius devocionis causa confluant, ad eandem de omnipotentis Dei misericordia ac beatorum Petri et Pauli apostolorum eius auctoritate confisi omnibus vere penitentibus et confessis, qui ipsam ecclesiam sive capellam in dedicacione et patrociniis eiusdem aut in nativitatis, circumcisionis, epiphanie, resurrectionis, ascensionis, corporis Domini nostri Jesu Cristi ac penthecostes necnon nativitatis, concepcionis, purificacionis, anunciacionis, visitacionis et assumpcionis beatissime virginis Marie, beati Johannis Baptiste atque Petri et Pauli apostolorum predictorum omniumque sanctorum festivitatibus devote visitaverint et ad fabricam paramentorum ecclesiasticorum, reparacionem conservacionemque dicte capelle divinique cultus inibi augmentum manus adiuctrices ac alia quecunque subsidia porrexerint caritatis quociens id fecerint, duos annos et totidem quadragenas. Insuper qui ad pulsum campane ipsius ecclesie sive capelle salutacionem angelicam videlicet tribus Ave Maria genibus flexis pro pace et unitate universalis ecclesie deigenitricem virginem Mariam devote salutaverint de mane aut de sero quadraginta dies similium indulgenciarum legacionis nostre, qua fungimur necnon cardinalatus auctoritatibus de iniunctis eis penitenciis perpetuis temporibus misericorditer in Domino elargimur. Datum Wyenne decte Pataviensis dyocesis die veneris decima octava mensis octobris anno a nativitate Domini millesimoquadringentesimo quadragesimotercio predicta sacrosancta sinodo Basiliensi durante.