Dem edlen herren hern Ruegern von Starhenberg lanntmarschalhen in Osterreich meim gnedigen lieben herren enpeut ich Barbara Andre des Awer seligen witib mein willig dinst bevor. Ich schikch ewrn gnaden ainen gemechtbrif hiemit, den ich gib junkchfraun Breiden, Veiten des Mulbanger tochter, meiner lieben muemen uber die hundert phunt phenning, die mir der benant mein wirt seligen auf ettleichen guetern ewr lehenschaft zu morgengab verschriben hat, den ewr gnad vernemen wirt. Bitt ich ewr gnad mit allem vleis, ir wellet ewrn gunst und willen zu solhem gemecht geben und das der benanten junkfraun Breiden bestetten, das will ich umb ewr gnad gern verdienn. Mit urkund des brifs, besigelt mit mein aufgedrukchten insigel. Und czu geczeugnus hab ich vleis gepeten den edln Benedicten Eyczinger, das der sein insigel auf den brif gedrukcht hat, im und sein erben an schaden. Geben zu Zbetel an suntag sant Cholmanstag anno Domini quadragesimotercio.