Dem erwirdigen geystleichen herren herrn Toman abt zw Lambach meinem genadigen lieben herren enpewt ich Anna Jacoben des Schefman purger zw Welss hawsfraw und Fridreichen des Mair von Hunthahen saligen tochter mein willig gehorsam dinst. Ich tue ewern gnaden zw wissen, das ich meinen eribtail und gerechtichait, so ich gehabt hab an der mull zu Hunthahen, verkawft hab meinem lieben prueder Philippen, Fridreichen des Mair zu Hunthahen saligen sun, dieselb mull von ewern gnaden und dem gotzhaws ze Lambach ze lehen beruert. Pitt ich, ewer gnad welle das verr meinem lieben prueder und seinen eriben leihen und bestatten, das will ich willichlich umb ewer gnad verdien, wen ich mein eriben noch nyemant von unsern wegen hinfur darein chain inred nicht haben sullen noch wellen in kainerlay weis trewlich und ungeverlich. Und schikch ewern gnaden auch des zw urchund den offen bettbrif besigelten mit des erbern Peter des Swaben aufgedrugkten insigel, den ich mit vleiss darumb gepeten hab, im und seinen eriben an schaden. Geben an sambstag nach Nycolay anno Domini etc. quadragesimotercio.