Wir Thoman von Gottes genaden abbt zu Lambach bekennen mit dem brieve, das fur uns komen ist Lienhart Mulner zu Widemspach anstat sein und seiner hausfrawn Margrethen, und habent mit wolbedachtem mut und gutem willen recht und redleichen verkaufft das haws und hofstat mit aller seiner zugehorung, so von altter und durich recht darzu gehort, darinn nichtz ausgenomen noch hindan gesatzt angever, gelegen hie in unserm markcht und purkchfrid zwischen Petern des Slesier und Mathesen des Sneyder baider hewsern und hofsteten, und habent das ze kauffen gegeben Kristann dem Poltinger, diezeit unserm schreiber, seiner hausfrawn Dorothea und allen sein eriben umb ain sum geltz, der sew gantz und gar ausgerichtt und beczalt worden sind zu rechtten tagen an allen schaden. Also haben wir dem yetz benanten Kristann, seiner hausfrawn Dorothea und allen sein eriben daz berurt haws und hofstat mit aller zugehorung zu rechttem kauff und purkchrecht bestett und verlichen, was wir in rechtleichen daran bestetten und verleichen sulln oder mugen, doch daz man uns und unserm gotshaus all jar jarleichen davon raichen und dienn sol des suntags nach der heiligen dreyer kunig tag funffczechen Wienner phenning. Es sind auch die obgemeltten Lienhart Mulner, sein hausfraw Margreth und irer baider ariben des benanten hauss und hofstat mit aller zugehorung des gemeltten Kristann, seiner hausfrawn Dorothea und aller seiner erben ir rechtt gwern und furstanndt fur all krieg, invall oder ansprach, wo und wann in des not und durft beschiecht mit dem rechten, als dann soleichs kauffs, purkchrechts und lanndes ob der Enns recht ist. Wir melden auch, daz sy kainerlay wanndlung damit nicht haben sulln in kainerlay weis an unser hanndt und gutem willn, und sulln uns auch alles daz davon leyden und dulden, daz annder soleich unsers gotshauss lewt gesessen hie in unserm markcht und purkchfrid gein uns leydent und duldent unverczigen unsers gotshauss rechten in allen sachen. Zewgen des oberurten kauffs und hanndlung, auch daz wir umb unser insigel gebeten wornden sein von erst die edeln weisen Erhart Paysz, Erasm Uczinger, die zeit unser richtter, und die erbern Paul Reindel, unser ambtman, Lienhart Gartnar, diezeit unser hofmaister, und Stephan Maurer under der pharr und annder frumer lewt ainkleich. Ze urkund geben wir in des also den offenn brief, besigeltem mit unserm anhanngunndem insigel. Geben als man zalt nach Kristi geburd in dem vierczechen hundert und dreyn und vierczigisten jaren an mantag an sannd Kilianstag.