Wir Thoman von Gottes genaden abbt zu Lambach, bekennen mit dem brief, das fur uns komen ist Herman Alramsperger und hat mit wolbedachtem mut und gutem willen recht und redleichen abtreten und ubergeben seinem lieben aydem und tachtter Wolfganng dem Grymssen, seiner hawsfrawn Anna und irn baiden eriben des guts ze Alramsperig, gelegen in Kirichdorffer pharr gleich halbs mit aller seiner zugehorung und daz eribrecht ist von uns und unserm gotshaws, des wir underwayst worden sein mit briefleicher urkund ausganngen von unserm vorsedel abbt Johannsen seligen gedechtnuss. Also haben wir in den yetz benanten, dem Wolfganng, seiner hausfrawn Anna und irn baiden eriben das benant gut gleich halbs mit aller seiner zugehorung bestett und verlichen, was wir in rechtleichen daran bestetten und verleichen sulln oder mugen, doch das man uns und unserm gotshaws all jar jarleichen davon raichen und dienn sol nach innhaltung unsers gotshawss urbarpuch. Es ist auch obgemellt Herman und all sein eriben des benanten gutz mit aller seiner zugehorung gleich halbs des gemeltten seins aydem Wolfganng und seiner hawsfrawn Anna und irer baider eriben rechtt gwern und furstanndt fur all rechtleichew ansprach, wo und wann in des not und durft beschiecht mit dem rechten, als dann soleichs abtretens, ubergebens, eribrechts und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weis an unser hanndt und gutem willen, und sulln uns auch alles das davon leyden und dulden, daz annder unsers gotshauss eribler gein uns leydent und duldent unverczigen unsers gotshaws rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburd in dem vierzechenhundertunddreynundvierczigisten jaren an suntag vor sannd Kilians tag.