Dem erwirdigen meinem gnedigen lieben herren hern n. abpt ze Lambach empewt ich Stephan Richtseysen gesessen bey Judenburg mein willig dienst. Ich lass euch wissen, das ich mitsampt meinen bruedern unserm vetter Thoman am Parcz als unser vetterleich erib, gelegen ze Puesing in Gerwoltschircher pharr, das von euch und ewrn gotshaus ze lehen und zinshafft ist, verchaufft haben. Bitt ich ewr gnad mit fleyss meins tails, ir wellet das penant mein vetterleich erib dem penanten Thoman am Parcz meinem vettern verleichen und daruber ewr brieffleich kuntschafft geben, das wil ich gern umb ewr gnad verdienn, wann ich mich des penanten meins veterleichen eribs genczleich verczigen hab und verczeich auch wissentleich mit chrafft des brieffs. Und des ze urchund schikch ich ewrn gnaden den brieff, verpetschafft mit des edeln vesten Adam am Poyn dieczeit phleger ze Liechtenstain pey Judenburg aygen aufgedrukchten petschafft, den ich penanter Stephan Richtseysen mit fleyss darumb gepeten hab, im und sein erben an schaden, darunder ich mich verpinde alles das war und stett ze haben, das in dem brieff ist geschriben. Geben ze Judenburg do man czalt nach Cristi gepurde tausentvirhundert und in dem drewundvircziggistem jare an eritag nach sand Giligentag.