Erwirdiger, geistleicher, genediger lieber herr. Ich Hanns Tischler am Puller und Torey mein hawsfraw und ich Taman Pachmayr von Altenhofen und Marigret mein hawsfraw, und ich Mertein von Huntessing, ich Taman, ich Ullreich sein brueder und all unser eriben und mitteriben, und ich Hennsel Weber von Petenhaym, und ich Wollfgang, ich Barbara, ich Anna seine gesbistret, auch all unser eriben und mitteriben, dafur wir uns all obenantt wissenleich angenomen haben, unser willig und gehorsam dinnst sein ewern genaden alczeit vorberayt. Wir lassen ewr genad wissen, das wir zw kchauffen geben haben ain viertail auf der Chnaussmul, dy gelegen ist in Gebolczchiricher pharr, Hannsen dem Sneider in Beinholcz, seiner hawsfraw und all sein eriben. Bitten wir all obenantt ewr genad mit allem fleyzz, ir welt dem egemelten Sneider den kchauff allso mit ewrem insigel bestetten. Und wann ir das also getan habt, so geloben wir all obgemelt mit unsern trewn an aydestat in ewr insigel furbass nichcz zw reden noch zw sprechen weder mit warten noch mit werichen, wenig noch vil in kchainerlay weis ungeverleich. Mit urchundt des briffs, den wir all obgemelt ewern genaden darumb geben, besigelten mit des edeln Fridreichs des Perchaymer aufgedruchten insigl, der das getann hat durich unser aller obenanter vleissigen pett willen, im und all sein eriben an schaden, darunder wir uns all obgemelt verpinten fur uns, all unser eriben und miteriben mit unsern trewn in aydesweis alles das war und stet zw hallden, das an dem brieff geschriben stet. Des sein zewgen und pet umb das sigel von erst Lienhart Rayd von Wilhesperig, Symon Wirt von Gaspolczhofen, Fridreich Aygner von Niederen Mechenpach. Der priff ist geben am phincztag nach goczleichnamstag von Christi gepurdt virczehenhundert und im zwayundvirczigisten jare.