Wir Thaman von Gottes genaden abbt zu Lambach bekennen mit dem brief, das fur uns komen ist Kasparr Mitterhover und hat mit wolbedachtem mut und gutem willen recht und redleichen verkaufft ain halb jewch akcher mit aller seiner zugehorung, genant Stainpuchel, gelegen hie in unserm purkchfrid in dem veld hintter dem markcht gein der Swaig, zwischen der Tewrbannger und Hannsen von Straahaym akchern, das er und sein hawsfraw Barbara halbs kawfleich in sein gwaltsam bracht habent von Barbara, Hannsen des Rughalbem seligen tachtter, und yetz Wolfganng des Pusser am Stadel, auch vormallen Petern des Podem seligen hawsfraw, und halbs hat es sein benantew hausfraw zu im bracht. Also hat nun der benant Mitterhover anstat sein, seiner benanten hawsfrawn das gemeltt halb jewch akcher ze kauffen gegeben Fridreichen dem Phisterperger, seiner hawsfrawn Anna und irn baiden eriben umb ain sum geltz, der sew gantz ausgerichtt und beczalt worden sind zu rechtten tagen an allen schaden. Also haben wir im dem yetz benanten Fridreichen, seiner hawsfrawn Anna und irn baiden erben das benant halb jewch akcher mit aller zugehorung zu rechttem kauf und purkchrecht bestett und verlichen, was wir in rechtleichen daran bestetten und verleichen sulln oder mugen, doch das man uns, unserm gotshaws all jar jarleichen davon raichen und dienn sol nach innhaltung unsers gotshawss urbarpuch. Es ist auch der obgemeltt Kaspar, mitsambt im sein benante hausfraw und irer baider eriben des gemeltten halben jewch akcher mit seiner zugehorung des benanten Fridreichen, seiner hawsfrawn Anna und irer baider eriben rechtt gwern und furstanndt fur all rechtleichew ansprach, wo in des not und durft beschiecht mit dem rechten, als dann soleichs kauffs, purkchrechts und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weys an unser hanndt und gutem willen, und sulln uns auch alles das davon leiden und dulden, das annder unsers gotshawss lewt gein uns leydent und duldent unverczigen unsers gotshawss rechten in allen sachen. Ze urkund geben wir in des also den offenn brief, besigeltem mit unserm anhanngunndem insigel. Geben als man zalt nach Kristi geburde in dem vierczechenhundertundzwayundvierczigisten jaren an eritag nach der heiligen dreyer kunig tag.