Wir Thoman von Gottes genaden abbt ze Lambach bekennen mit dem brief, das fur uns komen ist Wolfganng von Wallerstorf und hat mit wolbedachtem mut und gutem willen recht und redleichen verkaufft die selden ze Grunpach, gelegen in Gunskircher pharr, mit aller zugehorung, so von altter und durich recht darzu gehort und davon bekomen mag angever und recht lechen ist von uns und unserm gotshaws, des wir mit briefleicher urkund underweist worden sein, und hat das also ze kauffen gegeben Wolfganng dem Schondlein, seiner hausfrawn Klarein und irn baiden eriben umb ain sum gelts, der er gantz und gar ausgerichtt und beczalt worden ist zu rechtten tagen an allen schaden. Also haben wir im, dem benanten Wolfganng Schandlein, seiner hausfrawn Klarein und irn baiden eriben dy berurten selden mit aller iren zugehorung bestett und verlichen, was wir in rechtleichen daran bestatten und verleichen sulln oder mugen. Es ist auch der obgemellt Wolfganng von Wallnstorff und all sein eriben der berurten selden mit aller irer zugehorung des benanten Schandlein, seiner hausfrawn Klarein und irer baider eriben rechtt gwern und furstanndt fur all rechtleichew ansprach, wo und wann in des not und durfft beschiecht mit dem rechten, als dann soleichs kauffs, rechtlechens und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weys an unser hanndt und gutem willen, und sulln uns auch alles daz davon leyden und dulden, daz annder soleich unsers gotshawss lechenlewt gein uns duldent und leydent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburde in dem vierczechenhundertundzwaynundvierczigisten jaren an eritag nach der heiligen dreyer kunig tag.