Wir Thoman von Gottes genaden abbt zu Lambach bekennen mit dem brief, das fur uns komen ist Anna, Hannsen des Murren von Raid seligen tachtter, und hat mit wolbedachtem mut und gutem willen recht und redleichen gemacht und geben irm yeczundigen eleichen mann Jorigen, Bernharts Mair auf dem Perig sun, zwaintzigkch phunt phenning nach dem lanndts recht ob der Enns muns, darinn gib und gab aus irem gemachtt, das ir ir voderr man Wolfganng Tod seliger auf dem gut zu Arnolting, gelegen in Vischenhaymer pharr, gemachtt hat, nach innhaltung desselben brief ausweisung, das ausganngen ist von unserm vorsedel abbt Johannsen seliger gedachtnuss, und das da eribrecht ist von uns und unserm gotshaws. Also haben wir im, dem benanten Jorigen und sein eriben das gemellt gemacht und gegeben gut zwainczigk phunt phenning aus der benanten Anna gemachtt, so vorberurt ist, auf dem gemeltten gut bestett und verlichen, was wir in rechtleichen daran bestetten und verleichen sullen oder mugen, doch unengolten der benanten Anna an irr ubertewrung irs gemachts dannoch auf dem gemeltten gut, und in solcher beschaiden, das man uns und unserm gotshaws all jar jarleichen davon raichen und dienn sol nach innhaltung des briefs, so uber das benant gut ist, lawtt und sag. Es ist auch die obgemellt Anna und all ir eriben des benanten gemachts zwainczigk phunt phenning auf dem gemeltten und seiner zugehorung des guts des benanten Jorigen und aller seiner eriben rechtt gwern und furstandt fur all rechtleichew ansprach, wo in des not und durft beschiecht mit dem rechten, als dann solhs gemachts gebens guts und lanndes ob der Enns recht ist. Wer auch nagster erib zu dem benanten gut nach der benanten Anna abganng ist, der hat all jar jarleich lasung zu unser lieben frawntag der liechtmess vierczechen tag vor oder in den nagsten vierzechen tagen hinnach umb die obgemeltten zwainczigk phunt phenning. Wir offen auch, das sy kainerlay wanndlung damit nicht haben sullen in kainerlay weis an unser hanndt und gutem willen, und sullen uns auch alles das davon leiden und dulden, das annder unsers gotshauss eribler gein uns leident und duldent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburd in dem vierczechenhundertundzwayundvierczigisten jaren an phincztag in den vier tagen in der vasten.