Ich Katrey des Hainreichen ambtmann dacz Porcz hausfraw, enpewt dem erbern, weysen Mertan Alltag dacz Gaspelczhofen mein vleissig dinst. Ich tue euch zu wissen, das ich mein geleichen erbtail, so ich gehabt hab dacz Puebendorf auf dem Niedernhaws in Puchler pfarr und Starhenwerger gericht gelegen, und ist dinstper dem gotshaws ze Lambach und ainem ysleich abbt daselbs, verchaufft und zu chauffen geben hab meinem lieben pruder Gorgen dacz Pubendorf, auf demselben guet diselb czeit gesessen, Elspeten seiner hausfrawn und iren paiden erben, die si ycz haben oder noch hinfur kunfftigkleichen gewinnen, umb ain summa gelts, des ich von in zu rechter czeit und weil an allen schaden beczallt und ausgericht worden pin, daran ich ain guts genugen gehabt hab und hinfur haben sol, aus meiner gwallt, nucz und gwer in die iren mit allen ern, rechten und nuczen, als ich es selbs ingehabt und genossen hab. Ich verczeich mich auch des benanten meins erbteils gancz und gar in solicher beschaiden, das weder ich, all mein erben, frewnt noch nachkomen ycz noch hinfur ewigkleich kain zuspruch, rechten noch vodrumb nymmer mer habn noch gewinnen sullen noch wellen, weder mit recht noch an recht in kainerlay weyse treuleich und ungevarleich. Auf das pitt ich euch mit sunderm vleyss als meinen lieben ambtman, ir wellet dem benanten meinem lieben pruder Gorigen, Elspeten seiner hausfrawn und iren paiden erben den benanten kauff mit ewrm brief und pettschafft bestatten, wann ich noch all mein erben ycz noch hinfur kainn zuspruch noch einred in ewr petschafft haben noch wellen gewinnen in kainerlay weise trewleich. Und gib euch des mein pettbrief under des erbern, weysen Casparn Gayshofer, diczeit richter zu Grieskirichen, aigen aufgedrukten petschaffte, durich meiner vleissiger gepete willn, im und seinen erben an schaden und dem gotshaws zu Lambach und ainem ysleichen abbt daselbs unverczigen an seinen rechten, darunder ich mich obgenante Katrey mit mein trewn verpind fur mich, all mein erben und nachkomen alls das treuleich war und stat hallten, das an dem brief geschriben stet, der geben ist an sambcztag nach sannd Luceintag nach Christus gepurd, geczallt vierczehenhundert jar und im ains und vierczigkisten jare.