Wir Thoman von Gottes genaden abbt ze Lambach bekennen mit dem brief, das fur uns komen ist Hanns Topler ze Ottingdorf und hat mit wolbedachtem mut und gutem willen recht und redleichen gemachtt und geben seiner lieben eleichen hawsfrawn Kathrein, Kunrats an dem Rewt tachtter, das gut, genant das Topelgut ze Ottingdorf, gelegen in Ansvelder pharr mit aller zugehorung zu verlorem gut nach dem lanndts recht ob der Enns, das im sein vater Ulreich Topler ubergeben hat, und eribrecht ist von uns und unserm gotshaws, der wir underweist worden sein mit urkund ausganngen von unserm vorsedel abbt Johannsen seliger gedechtnuzz. Also haben wir ir, der benanten Kathrein und irn eriben das benant gut zu verlorem gut nach dem lanndtsrecht ob der Enns bestett und verlichen, was wir in rechtleichen daran bestetten und verleichen sulln oder mugen, doch das man uns und unserm gotshaws all jar jarleichen davon raichen und dienn sol nach innhaltung des briefs, so uber das benant gut ist lawtt und sag. Auch ist ze merkchen, ob das wer, das der benant Hanns, sein hawsfraw Kathrey nicht leiberiben miteinander hieten oder liessen, welichs under den benanten zwayn leiben am ersten abget, desselben nagsten eriben, das da abganngen ist, den sullen gevallen funfczechen phunt phening munss gib und geb im lanndt ob der Enns auf dem benanten gut an allew irrung des andern eriben ungeverleich. Wann dann des eriben, das am ersten abganngen ist, die benanten sum gelts emphachent, so sol dem andern leib, der in leben beleibt oder desselben eriben das benant gut zuegevallen und dabey beleiben auch an irrung des andern eriben ungeverleich. Darzu sol dem, der in leben beleibt oder sein eriben zugepuren und gevallen allew varundew hab, so baid benant leib miteinander habent oder noch gewingent. Es ist auch der obgemeltt Hanns, und all sein eriben des benanten guts mit seiner zugehorung zu gemachtt und verlornem gut in obverschribner mass der benanten seiner hawsfrawn Kathrein und irr eriben rechtt gwern und furstandt fur all rechtleichew ansprach, wo in des not und durft beschiecht mit dem rechten, als dann solhs gemachts, verlorens guts und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weys an unser hanndt und gutem willen, und sulln uns auch alles das davon leyden und dulden, das annder unsers gotshawss eribler gein uns leydent und duldent unverczigen unsers gotshawss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburd in dem vierczechenhundertundainsundvierczigisten jaren an mitichen vor sannd Pangretzen tag.