Wir Thoman von Gotes genaden abbt ze Lambach bekennen mit dem brief, das fur uns komen ist Andre Zymerman von Michelndorf und hat mit wolbedachtem mut und gutem willen recht und redleichen verkaufft sannd Jorigen perig in Kirichdorffer pharr gelegen, der eribrecht ist von uns und unserm gotshaws, und das er kawfleichen in sein gwaltsam bracht hat von Kathrein, Ulreich des Wolfler seligen tachtter, und hat den nun mit aller seiner zugehorung verkaufft und ze kauffen gegeben Steffann dem Huter, seiner hawsfrawn und irn baiden eriben umb ain sum gelts, der er gancz und gar ausgericht und bezalt worden ist zu rechtten tagen an allen schaden. Also haben wir im dem yetz benanten Steffann, seiner hawsfrawn und irn baiden eriben den gemeltten perig mit aller seiner zugehorung zu rechttem kauf und eribrecht bestett und verlichen, was wir in rechtleichen daran bestetten und verleichen sulln oder mugen, doch daz man uns und unserm gotshaws all jar jarleichen davon raichen und dienn sol zu unser lieben frawntag der dienstzeit drey Wienner phenning. Es ist auch der obgemellt Andre und all sein eriben des berurten perig mit aller seiner zugehorung des benanten Steffann, seiner hawsfrawn und irer baider eriben rechtt gwern und furstanndt fur all rechtleichew ansprach, wo und wann in des not und durft beschiecht mit dem rechten, als dann soleichs kauffs, eribrechtz und lanndes ob der Enns recht ist. Wir offen auch, daz sy kainerlay wandlung damit nicht haben sulln in kainerlay weis an unser hanndt und gutem willen, und sulln uns auch alles daz davon leyden und dulden, daz annder unsers gotshawss eribler gein uns leydent und duldent unverczigen unsers gotshawss rechten in allen sachen. Ze urkund geben wir in des also den offenn brief, besigeltem mit unserm anhanngundem insigl. Geben als man zalt nach Kristi geburd in dem vierczechenhundertundainsundvierczigisten jaren an mitichen an sannd Breyden tag der heiligen junkchfrawn.