Wir Thoman von Gottes genaden abbt zu Lambach bekennen mit dem brief, das fur uns komen ist Jorig Gartner und hat mit wolbedachtem mut und gutem willen recht und redleichen verkaufft den hof zu Freyhaim mit aller seiner zuegehorung, den er zu eribrecht von uns und unserm convennt gehabt hat, und hat den ze kauffen gegeben Chunratem dem Czywisslein, seiner hausfrawn Barbara, Hannsen an der Hub tachtter und irn baiden eriben umb ain sum gelts, der er gantz und gar ausgerichtt und beczalt worden ist zu rechtten tagen an allen schaden. Also haben wir im, dem yetz benanten Kunraten, seiner benanten hausfrawn und irn baiden eriben den benanten hof mit aller zugehorung zu rechttem kauf und eribrecht bestett und verlichen, was wir in rechtleichen daran bestetten und verleichen sulln oder mugen, doch daz man uns und unserm gotshaus all jar jarleichen davon raichen und dienn sol zu unser lieben frawntag der dienstzeit zwelif schilling Wienner phenning und zway huner, zu dem prehentag zwelif schilling Wienner phenning zu pawstewr. Es ist auch der obgemeltter Jorig und all sein eriben des benanten hofs mit aller zugehorung des gemeltten Chunraten, seiner hausfrawn Barbara und irer baider eriben rechtt gwern und furstanndt fur all rechtleichew ansprach, wo in des not und durft beschiecht mit dem rechten, als dann soleichs kaufs, erbrechts und lanndes ob der Enns recht ist. Wir offen auch, daz sy alles das davon leiden und dulden, das annder unsers gotshauss eribler gein uns leident und duldent unverczigen unsers gotshauss rechten in allen sachen. Ze urkund geben wir in des also den offen brief, besigeltem mit unserm anhanngundem insigel. Geben als man zalt nach Kristi geburde in dem vierczechenhundertundainsundvierczigisten jaren an mantag nach sannd Chunigunnden tag der heiligen junkchfrawn nach Oculi in der vasten.