Dem erwirdigen und geistleichen herren herrn Thoman, abbt zu Lambach, embewt ich Klara, Wolfgangs im Tal in Talhaimer pharr eleiche hawsfraw meinn willig diennst. Ich hab ain virtail aus dem guet in der Grueb in Gunskircher pharr gelegen bey Reytt verkawft meinem swager Hannsen dem Grueber und Barbara seiner hawsfrawn, meiner lieben swester, des sy lehentragerin an meiner stat von euren gnaden ist, dasselb mein virtail sennd ich euren genaden auf mit dem brief und bitt eur genad, ir wellet in den kauff vertigen und bestetten mit eurm insigl nach eurs goczhaws gewonhait und rechten, das wil ich gern umb eur genad verdienn, und wil auch hinfur eurn gnaden in eur sigel darumb nichcz reden noch tun in chainer weis, des sendtt ich euern genaden den brief under der ersamen und weysen Wolfgangen des Churczen, ainer des erbern rats zw Wels, und Hannsen des Hobschen, purger daselbs mit ir baider aufgedrukchten insigeln, dew ich mit vleis darumb gepettn hab, in und iren eriben an schaden. Geben zw Wels am phincztag nach sand Niclastag anno Domini etc. xxxviio.