Wir Johanns von Gotes genaden abbt ze Lambach, bekennen mit dem offenn brieff, das fur unns komen ist Stephan Schilher und hat mit unnserer hant und gantzer stet recht und redleich verkaufft ain guet ze Riedendarff mit aller seiner zugehorung, gelegen in Rieder phar, seinem brueder Hainreichen, Margrethen seiner hausfrawenn, und ir baider eriben umb ain summ geltz, der sy in gantz ausgericht und beczallt habent ze rechten tegen an scheden. Also haben wir dem benanten Hainreichen, seiner egemelten hausfrawen und ir baider eriben dar vorgemelt guet mit aller seiner zugehorung darinn nichtz ausgenommen an geverd, verlihen und bestett zue ainem rechten eribrecht in der beschaiden, das sy unns und unserm gotzhaus alle jar jarlich da von dienn und raichen nach innehalltung unnsers gotzhaws urbar. Es ist auch der benannt Schilher und sein eriben des vorgemelten guetz des benanten Hainreichen, seiner hausfrawen und irr bayder eriben recht geweren und furstandt fur all rechtleich ansprach, als offt in des not und durfft geschicht, also dann solichs kauffs, eribrechts und lands ob der Enns recht ist angeverd. Wir melden auch, das sy mit dem benanten guet kain wandlung sullen haben in kainerlay weis an unser hant und gueten willen, und sullen auch alles das davon leiden und dulden gen uns und unserm gotshaus, das ander unsers gotzhaus eribler leident und duldent unverczigen unnsers gotzhaus rechten in allen sachen. Des ze urchunt geben wir in den brieff mit unnserem anhangundem insigl, der gegeben ist nach Kristi geburd vierczehen hundert jar und darnach in dem vier und dreissigisten jar an mitichen vor sant Agnesen tag.