Wir Johanns von Gotes genaden abbt ze Lambach bechennen, das fur uns kommen sind Fridreich und Hanns, gebrueder, Hannsen des Alramer seligen sun, und ir muem Margreth, die hat sich wissenleich angenomen fur sich und fur ir swesster Affra, die noch nichtt vogtper ist, Gerungen des Alramer seligen tochtter, und habent mit veraintem rat und guetem willen irer nagsten und pessten frewndt recht und redleich verchaufft all ir gerechtigkait, so sy gehabt haben an dem guet ze Alramsperg in Kirichtorffer pharr irem lieben brueder und vettern Herman dem Alramsperger, seiner hawsfraun Kathrein und iren baiden eriben umb ain summ gelts, des sie gants beczalt sind. Also haben wir dem benanten Hermann, seiner hausfrawn Kathrein und iren baiden eriben die egenanten gerechtigkait auf dem benanten guet mit aller seiner zuegehorung, darinn nichts ausgenomen angever, verlihen und bestett zu rechttem eribrechtt in der beschaiden, das sy uns und unserm gotshaus alle jar jerleich da von dienn schullen ze unser frawn tag sechczikg Wienner phening, zu dem prehentag zwainczigk Wienner phening ze pawstewr, ze sand Jorigen tag zehen phening ze vogtsteur und unverczigen unsers gotshauss rechten in allen andern sachen. Die obgemelten Fridreich, Hanns, Marigret und Affra und ir aller eriben verczeihen sich nu furbas des egenanten guets gantz und gar, das sy noch ir eriben noch nyemant anders furbas von irn wegen kain ansprach darnach nymmer haben sullen in chainer weis getreuleich angever ausgenomen, in geb der tod ichtt rechtleich. Des ze urchund geben wir in den brief besigelten mit unserm anhangunden insigel, der geben ist nach Kristt gebuerd vierczehen hunndert jar und dar nach in dem vier und dreissigistten jar ann dem nagsten phincztag vor sand Jorigen tag.