Wir Johanns von Gotes genaden abbt ze Lambach bekennen mit disem brief, das fur uns komen sind Wolfgang Pawswek und Ellspeth sein hawsfraw, und habent uns ze wissen getan, das sew Hannsen dem Unnger, seiner hawsfrawn und iren baiden eriben ze kawffen gegeben haben das haws und hofmarich mit aller seiner zuegehorung, gelegen in unnserm purkchfrid zee Lambach, ze nagst ober halb des prunn und an des Weigel Sneyder haus, und baten uns, dem egemelten Unnger, seiner hawsfrawn und baiden iren eriben den kawf zu bestetten. Das haben wir getan wissenleich in kraft des gegenwurttigen briefs, also was irn zu recht daran rechtleich bestetten sullen oder muegen, also fuerbasse das inne haben, nuczen und niessen und allen iren frummen damit zee schaffen, also purkchrechts und landtes ob der Enns recht ist, doch uns und unnserm gotshaus unvergriffenleich in allen anndern sachen. Des zee urkunde geben wir in den brief, besigelten mit unnserm anhangunden innsigel, der gegeben ist nach Krisst gebuerde vierczehen hundertt jar und dar nach in dem drew und dreyssigistten jaree an dem sunnttag nach sande Jacobs tage des heiligen zwelifpaten.