Wir Johanns von Gotes genaden abbt ze Lambach bekennen, das fur uns komen ist Anna, Ullreichs von Hofarn seligen tachtter, und Hannsen des Mullner ze Pawngarting seligen witib, und yeczund Wolfgang Mair, Ullreichs von Gunczchirchen sun hawsfraw, und hat mit wolbedachtem muet und guetem willen rechtt und redleich gemachtt und gegeben dem yecz benanten irem lieben wirtt Wolfgang zehen phund phenning ze rechtter margengab nach lancz recht auf irem geleihen eribtail, so sy hat auf der Dietmairs hueb ze Hofarn mit aller irer zuegehorung, gelegen in Newnkircher pharr. Allso haben wir dem benanten Wolfgang das egenantt gemachtt bestatt mit allew dem, so vann alter und durch recht darczue gehort oder da von bechomen mag, nichts ausgenomen in der beschaiden, das man uns und unserm gotzhaus alle jar jarle[ich] da von dienn und raihen sol nach innhalltung unsers urbar. Es ist auch die egenant A[nna und] ir eriben des egemelten gemachts und margengab auf dem egenanten eribtail des bena[nten irs] lieben wirts Wolfgang sein rechtt gewern und furstand, fur all rechtleich ansprach also [...] solichs gemachts margengab und landts ob der Ens recht ist. Wir offen auch, sy sullen chain wandlung dar mit haben in kainerlay weis an unser handt und gueten willen und sullen auch alles das da von leyden und dulden, das ander unsers goczhauss eribler genn uns leyden und dulden unverczigen unnsers goczhawss rechten in allen sachen. Des ze urchund geben wir in den brief, besigelten mit unnserm anhangunden innsigel, der gegeben ist nach Christt gebuerde vierczehen hunndertt jar, und dar nach in dem ains und dreyssigistten jare am erichtag nach sand Kolomans tage.