Wir Albrecht von Gotes gnaden heczog ze Osterreich, ze Steir, ze Kernden und ze Krain, markgraf ze Merhern und grave zu Tirol etc. embieten unsern getrewn lieben n. unsern ambtlewten und burgern ob der Enns, den der brieff geczaigt wirt, unser gnad und alles gut. Uns hat furbracht der ersam geistleich unser lieber andechtiger n. der abbt ze Lambach, wie ir seins goczhawss lewten ze Lambach gesessen nicht wellet gunnen mit wein und anderm gewerben ze arbaitten in den freyhaiten und rechten, als dasselb gotshaws und sein leut von alter her getan und darumb brief haben, daz si solicher arbeit recht haben, emphelhen wir ew und wellen ernstllich, daz ir si die egemelt arbait mit weinn und anderm ding diczmals ungeirret treiben lasset, und si dann nicht hindert, wan wir in willen haben uns selber hinauf uber die Enns zu fugen oder unser ret und anwelt in kurcz hinauf ze schikhen, die sich lautter und aigentleich darum ervarn und auffundig machen, bey wen es besteen sull, daran tut ir genczleich unser maynung. Geben zu Wienn an suntag nach aller heiligen tag anno etc. tricesimoprimo.