Ich Susanna, Niklasn des Dewczschlein hawsfraw, und Anna ir swesster, Hainreichs des Melsumpper saligen tochtter, bekennen mit dem offenn brief fur uns und all unser eriben, das wir uns nach rat unser nagsten und pessten frewndt und nach underweysung erber, frummer lewt liebpleich verrichtt und veraint haben mit unser stewfmueter Ellspeten, Hannsn des Mawrer am Stadel hausfraw, umb alles das guet, so dann der benant unnser lieber vater saliger hinder im lassen hat haws, hofmarich, akcher, varund und anligund guet oder wie so das alles genant ist, nichts ausgenomen ungeferleich, darumb uns von der egenanten unnser stewfmueter ein gancs benuegen peschehen ist mit ainer summ gelts, daran uns benuegt wol, und verczeychen uns nw furbas des benanttn guets alles, alss oben begriffen ist, das wir noch unser eriben furbas chainerlay ansprach darnach nimer haben sullen noch welln in chainerlay weis getrewleich angeferd. Des czu urkund gebn wir in den brief besigelten mit unsers genedign herrn herrn Johannsen, abbt czu Lambach, anhangunden innsigel, den wir vleyssichleich darumb gepeten haben, im und seinem goczhaus an schadn, und unpegriffenleich des goczhauss rechten in allen sachen, darundr wir uns obgenant czwo swesster fur uns und all unser eriben mit unsern trewn in aydesweis verpinden, alles das war und stat zu halten, das an dem brief geschriben stet. Der brief ist geben nach Christ purd vierczehnhundert und in dem drewsskisten jar an sand Pangraczen tag.