Wir Johanns von Gotes gnaden abbt ze Lambach bekennen mit dem offenn brief allen, dem er furkumbt, daz fur uns komen sind Ullreich Ekchmair, burger ze Wels, Jacob, Margret, Katrey, Elsbett, Agnez, alle geswistrid, und Hanns von Hag an statt seiner chinder, dye ir swester chinder sind, und habent mit wolbedachten muet recht und redleich verkaufft iren gleichen eribtail, so sy gehabt habent an dem gut in der Lankchwis, gelegen in Puechkircher pharr, und habent den keufleich ze chauffen geben irem liebem brueder Hannsen dem Mayr ze Utental, Barbara seiner hausfrawn und allen iren baider eriben umb ain summ gellcz, der sy gantz und gar betzallt sein von in ze rechten tagen an schaden. Also haben wir auch dem obgenanten Hansen, seiner hausfrawn und iren baider eriben daz obgenant gut mit aller seiner zugehorung ze ainem rechten eribrecht bestett und verlichen mit alle den eren, rechten und nutzen, die von allter und durich recht darzu gehorent, und davon bekomen mugen, besucht und unbesucht, nichtz dar inn ausgenomen, treuleich angever in der beschaiden, daz sy uns und unserm gotzhaus alle jar jarleichen an unser frawn tag ze der dienst czeitt davon dienn und raichen sullen funfczigk phening und sechs huener, an sand Michels tag czehen phennig ze weinfur, an dem prehentag czwaintzigk phennig ze pawsteuer und an sand Jorgen tag czehen phennig ze vogtsteuer. Es sind auch die obgenanten geswistred alle und all ir eriben des benanten eribtail recht gewer und furstandt fur all rechtleich ansprach als offt daz dem obgenanten Hansen, seiner hausfrawn oder iren baider eriben des mit recht nott und durfft geschiecht, also kauffs und lands recht ist im lanndt ob der Enns. Wir offen auch, daz sy chain wanndlung damit nicht haben sullen in dhainerlay weis an unser hanndt und guten willen und sullen auch alles davon leiden und dulden gein uns und unserm gotzhaws, daz ander unsers gotzhaus erbler gein uns leident und duldent unverczigen unsers gotzhaus rechten in allen sachen. Mit urkund gebem wir in den brief besigelten mit unserm anhangunden insigel, der gebem ist nach Christi geburd vierzehenhundert jar, dar nach in dem newn und czwaintzgisten jar am freytag nach dem heyligen phingst tag.